VERA1AB01 - Virðing, efling, rökhugsun og atorka II

Markmið áfangans er að efla sjálfstraust nemenda í námi og framkomu. Nemendur fá þjálfun sem gagnast þeim í öðru námi við skólann eins og hópastarfi, samskiptum, framkomu og tjáningu. Áhersla er lögð á að efla samskiptahæfni nemenda, kurteisi, gagnkvæma virðingu og samvinnu þeirra á milli. Nemendur eru þjálfaðir í tjáningu, raddbeitingu, ritun tölvupósta og bréfa. Áfram er lögð áhersla á að nemendur séu ábyrgir fyrir námi sínu og áfangavali. 

Nemandi skal hafa öðlast þekkingu og skilning á:

• Algengum samskiptareglum.
• Mikilvægi þess að koma skoðunum sínum á framfæri.
• Að fólk er mismunandi og getur haft ólíkar skoðanir.
• Að hegðun og framkoma hefur áhrif á aðra.
• Mikilvægi þess að ver kurteis og sýna virðingu.
• Kostum þess að vinna með fjölbreyttum hópi fólks.

Nemandi skal hafa öðlast leikni í að:

• Beita algengum samskiptareglum við mismunandi aðstæður.
• Gera sér grein fyrir að eigin framkoma hefur áhrif á aðra.
• Virða og taka tillit til annarra.
• Geta tjáð sig fyrir framan hóp af fólki.
• Vinna með öðrum að sameiginlegu verkefni.

Nemandi skal geta hagnýtt þá almennu þekkingu og leikni sem hann hefur aflað sér til að:

• Beita rökhugsun til þess að draga ályktanir og setja fram gagnrýni á skipulegan hátt.
• Geta gert grein fyrir sjónarmiðum sínum og skoðunum á málefnalegan og rökstuddan hátt.
• Sýna öðrum einstaklingum, skoðunum þeirra og lífstíl virðingu og umburðarlyndi.
• Takast á við sameiginleg verkefni.

Undanfari: Áfangi tekinn á 2. önn.

Námsmat: Símat.