SAGA3CE05 - Helförin

Söguáfangi með námsferð til Póllands þar sem gist verður í 4 nætur Kraká. Farin verður dagsferð í Auschwitz og Schindlerssafnið verður skoðað ásamt öðrum sögulegum stöðum í Kraká. Helförin verður skoðuð frá ýmsum hliðum þar sem saga gyðingaofsókna í Evrópu verður sett í samhengi við uppgang nasismans í Þýskalandi. Farið verður yfir þróun borgaralegra réttinda gyðinga á millistríðsárunum og hvernig þau enduðu með þjóðarmorði. Sérstök áhersla verður á sögu gyðinga í Þýskalandi og Póllandi og hugmyndafræði nasismans sem verður rannsökuð ítarlega. Einnig verður farið yfir ofsóknir annara jaðarhópa í Þriðja ríkinu. Að endingu verður helförin sett í samhengi við þjóðernishreinsanir og flóttamannavandamál sem hafa átt sér stað síðan. Nemendur lesa valdar greinar frá kennara og horfa á viðtöl við eftirlifendur helfararinnar ásamt heimildamyndum

Nemandi skal hafa öðlast þekkingu og skilning á:

• Gyðingaofsóknum og örlögum gyðinga í seinni heimsstyrjöld og annara jaðarhópa í Þriðja ríkinu.
• Sögu þýskra þjóðernissósíalista og hugmyndafræði þeirra.
• Menningu og sögu Póllands í seinni heimsstyrjöld.
• Sögu og starfsemi útrýmingabúðanna í Auschwitz.

Nemandi skal hafa öðlast leikni í að:

• Beita sjálfstæðum vinnubrögðum við öflun heimilda og úrvinnslu þeirra.
• Tjá sig í ræðu og riti um efni áfangans, rökræða efnið og geta miðlað því á fjölbreyttan máta.
• Skilgreina þau hugtök sem áfanginn fjallar um.
• Greina áreiðanleika heimilda og upplýsinga sem er að finna um efnið.
• Lesa fræðilega texta á íslensku og erlendum málum um efni áfangans.

Nemandi skal geta hagnýtt þá almennu þekkingu og leikni sem hann hefur aflað sér til að:

• Skilgreina orsakir þessara voðaverka, gera sér grein fyrir afleiðingum þeirra bæði staðbundið og á heimsvísu.
• Átta sig á hvers vegna leiðtogar og hópar hvetja til voðaverka gegn þjóðum, þjóðarbrotum og etnískum hópum.
• Greina orsakir þess að stórþjóðir og alþjóðastofnanir eru oft svifaseinar og getulitlar í málum þeim sem áfanginn fjallar um.